Вангел Цоканчев кој бил возач на Митко Чавков на 27 април рече дека тој ден околу 18 часот од ресторанот ,,Скара бар“ во Скопје го возел Чавков до зградата на Технометал Вардар која се наоѓа зад трговскиот центар Палома Бјанка каде што Чавков, како што рече сведокот, имал приватни канцеларии.
Александар Василевски Нинџа го праша сведокот дали во зградата во која се наоѓа Технометал Вардар има лифт кој излегува на плоштадот пред седиштето на ВМРО ДПМНЕ. Сведокот потврди дека има лифт во зградата, но не знаеше да каже дали излегува пред „Белата палата“. Тој потврди дека на 27 април од 18 до 20 часот бил на паркингот на Технометал Вардар и ВМРО ДПМНЕ.
Претходно, сведокот раскажа каде се го возел Чавков на 27 април и кажа дека тој ден поранешниот директор на БЈБ го зеле од дома околу 9 и 30, и го однеле во МВР. Таму останале до 13 и 30 по што го однел Чавков на стоматолог, потоа во Сити мол и во ресторанот „Скара бар“.
Околу 18 часот заминале кон зградата на Технометал, а два часа подоцна, околу 20 часот Чавков заминал во штабот на МВР, кој бил во новата зграда на граничната полиција и таму останале до полноќ. Потоа отишле во штабот на ВМРО ДПМНЕ каде што, според сведокот, Чавков останал неколку часови.
Чавков заминал дома кога се разденувало.
И судијката Кацарска го испрашуваше сведокот да посочи кои лица биле присутни во штабот на МВР.
По неколку инсистирања на Кацарска, сведокот се сети дека го видел министерот Агим Нухиу, но не се сеќаваше дали разговарале Чавков и Нухиу. На прашање на Кацарска сведокот рече дека видел како дел од присутните во штабот зборувале на телефон или на радио врска, но не можеше да каже колку лица имало во просторијата.
Обезбедувањето на Чавков контра Нинџа
На денешното рочиште сведочеше и Никола Димитревски, кој го обезбедувал Чавков.
Тој рече дека Чавков на 27 април не бил во ВМРО ДПМНЕ во 18 часот, како што сведочеше минатата недела Александар Василевски Нинџа.
Според Димитриевски, Чавков во 18 часот бил во канцеларија која што ја имал во „Технометал Вардар“ и таму останал два часа. По ова, Чавков заминал во МВР каде што се задржал до полноќ, а потоа отишол во штабот на ВМРО ДПМНЕ за да се види со Тодоров. Сведокот кој сведочи по барање на Чавков претходно кажа и дека Чавков како директор на Бирото за јавна безбедност го обезбедувале 7 лица со три возила: „Мерцедес“, „Ауди“ и „БМВ“.
Александар Василевски Нинџа го испрашуваше Димитриевски при што го праша дали паркингот во Технометал Вардар е ист со паркингот кој го користи ВМРО ДПМНЕ.
Сведокот рече дека Технометал Вардар и ВМРО ДПМНЕ користат ист паркинг.
Потоа и судијката Добрила Кацарска го испрашуваше Димитриевски, при што тој не можеше да се сети какви наредби давал Чавков.
По паузата, судењето ќе продолжи со сослушување на сведоци на обвинетиот Душко Лазаров.
Трајко Вељаноски утрово дојде да сведочи во Основниот суд, но судот го ослободи со образложение дека ќе биде повикан по паузата, но неговото сведочење во договор со судијката и адвокатите, останува за утре.