Ерик Друе, неформален лидер на движењето „Жолти елеци“, е ослободен од притвор до датумот на закажаното судење по обвинението за организирање на протест без претходно да ја информира полицијата, соопштија француските обвинители.
Тој беше приведен синоќа во близина на „Плас де ла Конкор“ во Париз каде што заедно со други демонстранти планираа да запалат свеќи во чест на загинатите или повредени припадници на движењето.
Парискиот обвинител Реми Хаиц изјави дека Друе во средата објавил повик на социјалните мрежи за собир во централнозападниот дел на Париз.
„Тој беше уапсен откако ги игнорира наредбите од полицијата да се тргне од булеварот, изјави Хаиц.
Во изјава за медиумите по неговото ослободување, Друе нагласи дека сакал да бидат запалени свеќи за „повредените или убиените во Париз“, а властите „дури ни тоа не го дозволиле“. Неговото апсење го оцени како политички мотивирано.
Според податоците на француското Министерство за правда, за време на протестите на „жолтите елеци” во Франција, од 17 ноември до 17 декември, биле приведени најмалку 4.570 лица, од кои 1.567 само во Париз, на 216 им е одреден притвор, а во тек се кривични истраги за најмалку 697 лица.
За време на протестите во кои живот загубија десет лица и над 1.000 беа повредени, често доаѓаше до судир меѓу демонстрантите и полицијата, беа опожарени голем број на автомобили, а многу продавници беа ограбени.
Протестите на „жолти елеци” беа насочени против францускиот претседател Емануел Макрон, кој кон крајот на минатата година прифати некои од барањата на учесниците во протестите во врска со даночни олеснувања и економска помош.
Движењето на „жолтите елеци“ настана на 17 ноември кога започнаа протестите поради зголемувањето на даноците за гориво, а името го доби по флуоросцентните елечиња што француските возачи мора да ги имаат во автомобилите согласно Законот.