Фудбалскиот свет со проштални пораки за Емилијано Сала чие безживотно тело беше извадено и идентификувано по падот на авионот во Ла Манш. Потврда на наодите по обдукцијата стигна и од британската полиција по што последен поздрав упати и Кардиф, клуб во кој младиот напаѓач направи трансфер од Нант за 17 милиони евра.
„Засекогаш ќе бидеш во нашите мисли. Со голема тага ја примивме последната вест. Сочувство до семејство“, се наведува во пораката на англискиот премиерлигаш од Велс.
Преку социјалните мрежи се огласија Нант, Реал Мадрид, Манчестер јунајтед, Интер, Бенфика, Бока јуниорс, Барселона, Лацио, Валенсија, Порто, Милан, Ливерпул, Челзи, Ајакс, Рома, Јувентус и многу други. Но, и големи имиња на фудбалската игра како Серхио Агуеро, Вејн Руни, Икер Касилјас, Мичи Батчуаи, Месут Озил, Килијан Мбапе, Корентин Толисо , итн.
Авионот од типот „пајпер“ исчезна од радарските системи на 21 јануари. Покрај Сала, во леталото се наоѓаше и пилотот Дејвид Иботсон. Официјалната спасувачка операција траеше три дена по што беше прекината, па семејството на аргентинскиот напаѓач продолжи со приватна истрага со поддршка на фудбалери ширум светот.