Диего Симеоне останува во Атлетико Мадрид до 2022 година. Аргентинскиот менаџер го продолжи договорот со „јорганџиите“ за дополнителни две сезони и на тој начин ги прекина шпекулациите за можно преземање на Интер од Лучано Спалети. И самиот неретко ги подгреваше со порака дека кога-тогаш ќе се врати кај „нероаѕурите“ чии рози не цветаат како што посакува раководството на „Џузепе Меаца“.
Интерес за него имаше и од Манчестер јунајтед (пред ангажманот на Солскјер) и од Челзи (како наследник на Маурисио Сари), но сега е веќе јасно каде се гледа и во периодот по истек на тековниот договор во летото во 2020 година. Со новиот параф е обезбеден мир и за челниците на Атлетико Мадрид од можно губење на тренерот со кој клубот освои седум титули од 2011 година и двапати играше во финале на Лигата на шампиони. Но, мир осигура и популарниот „Чоло“ пред осминафиналниот двомеч со Јувентус во ЛШ.
Атлетико Мадрид под водство на Симеоне има три трофеи во Шпанија (по еден во Примера, во националниот Куп и во Суперкупот) и по два во европскиот Суперкуп и во Лига Европа.
Фудбалската кариера ја заврши во Расинг Клуб во 2006 година. Играше уште за Велез Сарсфилд, за Пиза, за Севилја, за Интер, за Лацио и во два наврата за Атлетико Мадрид. Како менаџер, пак, работеше во Расинг Клуб, во Естудијантес, во Ривер Плата, во Сан Лоренцо и во Катанија. Дресот на „гаучосите“ го носеше во 106 меча во кои постигна 11 гола.