Прволигашки фудбал во Албанија во претсојниот викенд ќе нема. Фудбалската федерација на западниот сосед ги одложи сите натпревари од елитната конкуренција поради штрајк на судиите. Прекинот на шампионатот е последица на напад врз арбитар, па неговите колеги, во знак на солидарност, се решија за бојкот се додека не биде задоволено нивното барање за соодветна заштита на стадионите.
Фудбалерите и стручниот штаб на екипата на Камза во изминатиот викенд го претепаа главниот судија во мечот со Лачи. Следуваше експресна реакција на албанската фудбалска федерација која ја исклучи Камза, ги казни челниците на клубот и изрази поддршка на судиите кои најавија дека нема да делат правда ако полицијата не се врати на стадионите.
Новиот закон за спорт и за безбедност на играчите и на гледачите во Албанија наложува ангажман на клупско обезбедување. Но, таквата одлука се покажа како лоша бидејќи фудбалерите и стручниот штаб го опколија главниот судија и почнаа да го тепаат, откако досуди пенал за Лачи во 90. минута.
Натпреварот заврши 1:1, израмнувачкиот гол за гостите го постигна поранешниот член на Хоризонт Турново и на Работнички, Бојан Најденов.