На 29 март беше распишан тендер за набавка и инсталација на нови електростатски филтри во РЕК Битола. Инвестицијата се проценува на 20,4 милиони евра што компанијата ги обезбедува од сопствени извори. Една од најзначајните компании во државна сопственост инвестира повеќе од 20 милиони евра кои сама ги заработила што значи дека минато се времињата кога Државните електрани кубуреа со струја, се увезуваше скапа струја и парите оделе во непотребни инвестиции. Сега ЕСМ е насочена кон произвдство на струја за задоволување на потребите на потрошувачите во земјата, а од неодамна врши и продажба на вишоци со што остварува добивка и за сопствениот и за државниот буџет.
Ова денеска го изјави премиерот Зоран Заев кој ја посети РЕК Битола и се сретна со директорот на АД ЕСМ Драган Миновски и директорот на РЕК Битола Васко Ковачевски, направи обиколка на производствените капацитети и реализираше средба со Управниот и Надзорниот одбор на компанијата.
„Инвестицијата во реконструкција на системот на електростатските филтри на РЕК Битола е дотолку позначајна што е најголема во областа на заштита на животната средина во земјава или барем во компанија во државна сопственост. Заштитата на животната средина во минатото беше запоставена, а сега претставува еден од приоритетите на оваа Влада. И ќе биде уште позначајна како Република Северна Македонија ќе чекори кон НАТО и Европската Унија, каде стандардите се на високо ниво“, нагласи Заев.
На почетокот на постапката за реконструкција на електростатските филтри во РЕК Битола, како што рече премиерот, се надоврзуваат и планираните тендери на Државните електрани за изградба на ветерен парк во Богданци – втора фаза и тендер за изградба на ветерен парк во Миравци, а на есен се очекува и почетокот на изградбата на топлификацијата кон Новаци, кон Могила и кон Битола.
Заев истакна дека Државните електрани ќе имаат владина поддршка во сите чекори и проекти што ги реализираат и ги планираат бидејќи, како што рече, без стабилен електроенергетски систем, нема стабилна држава.