Икер Касилјас ја напушти болницата во Порто во која мина неколку дена по срцевиот удар што го доживеа за време на тренинг на португалскиот клуб од „Драгао“. Драмата се случи во средата кога шпанскиот голман беше итно хоспитализиран и по деталните прегледи и анализи доби дозвола за излез. На заминување порача дека ќе одмора одреден период и оти не знае дали воопшто ќе продолжи да брани.
„Најважно е дека излегов и се добро заврши. Пред неколку дена бев во тешка ситуација и тоа е нешто што може да се случи во секој момент. Сега сум во ред. Имав многу среќа. Благодарност до сите што се грижеа за моето здравје. Мило е што знам оти имам многу пријатели. По се што минав, може да се насмевнам и да продолжам натаму“, истакна Касилјас.
Тој се заблагодари на медицинскиот тим на Порто за експресната реакција со што се спречија натамошни компликации и последици од инфарктот.
Касилјас е во Порто од 2015 година. Лани ја освои шампионската титула во Португалија и го забележа рекордниот 177 настап во Лигата на шампиони. На „Драгао“ пристигна од Реал Мадрид чиј гол го бранеше цели 16 години. За „кралевите“ одигра 725 натпревари и освои три шампионски титули во Лигата на шампионите и пет во Примера.
Со репрезентацијата на Шпанија освои два европски трофеја од првенствата во 2008 година и во 2012 година и еден светски на мундијалот во 2010 година.