Документите за распишување на потерницата по Никола Груевски за терористичко загрозување на уставниот поредок за настаните од 27 април се доставени до Интерпол и очекуваме потерницата да биде објавена, кажа денеска министерот за внатрешни работи Оливер Спасовски одговарајќи на новинарско прашање по официјалното почнување на твининг-проект за усогласување на националните системи со ЕУ и шенгенските барања за гранично управување.
„Интерпол, сè уште врши некакви испитувања. Потерницата што е испратена ги исполнува критериумите за да биде објавена. Потерницата со сите потребни документации и без никаков недостаток е доставена до Интерпол“, рече Спасовски.
Спасовски кажа дека нема никаква правна пречка потерницата за Груевски да биде објавена во Интерпол, особено за вакви кривични дела и очекува дека врвот на Интерпол ќе донесе таква одлука.
Интерпол веќе два месеци не ја објавува потерницата на Груевски кого Обвинителството за организиран криминал го сомничи како организатор на настаните од 27 април. Обвинителката Вилма Рускоска минатата недела изјави дека Интерпол одбива да распише потерница за Груевски и за разузнавачот Никола Бошкоски, обајцата осомничени како организатори на крвавите настани од 27 април.
Познавачи на оваа област за НОВА објаснија дека правилата на Интерпол се сменети и од 2015 година оваа меѓународна организација ги либерализира правилата за тоа во кои случаи важи црвената потерница.
Оттогаш, со црвена потерница не се бараат лица во следните случаи:
– кога е потврден статусот на бегалец или барател на азил, кога
– кога има известување дека се стравува оти поединецот во земјата што го бара ќе се соочи со прогон
– кога доделувањето на статусот на бегалец не е засновано на политички причини во однос на земјата што го бара.
Во појаснувањето на овие нови правила се истакнува дека „со прифаќањето на овој нов пристап, организацијата официјално признава дека кога станува збор за меѓународната полициска соработка, чие унапредување е примарна цел на организацијата, бегалците заслужуваат посебна заштита на ИНТЕРПОЛ. Оваа посебна заштита е неопходна за заштита на бегалците од земјите-членки кои ги злоупотребуваат каналите на ИНТЕРПОЛ да ги прогонуваат политичките противници и другите жртви на корумпирано кривично гонење“.
Според експерти за азил, овие правила се либерализирани главно поради случаите со руски државјани кои се цел на прогон во земјата поради политички ангажман или активизам, поради што бегаат во други земји во светот, но Русија преку Интерпол ги бара да бидат испорачани назад. Интерпол на својот сајт не ја објави ниту потерницата на Груевски по барање на македонските власти по неговото бегство во Унгарија за случајот „Тенк“.