По десетчасовна расправа, пратениците ги разрешија министерите за финансии и за локална самоуправа, Драган Тевдовски и Сухејл Фазлиу и министерот без ресор задолжен за спроведување на Рамковниот договор Хазби Лика. Претходно беа констатирани оставките на министрите за земјоделство и за култура, Љупчо Николовски и Асаф Адеми, како и на министерот за животна средина Садула Дураку и министерот без ресор Зоран Шапуриќ.
Денеска пратениците ќе гласаат за новите министри – Трајан Димковски е предложен за нов министер за земјоделство, Насер Нуредини за животна средина и просторно планирање, Хусни Исмаили за култура, Горан Милевски за локална самоуправа, Садула Дураки за политички систем и односи меѓу заедниците.
Во дебатата, опозицијата критикуваше дека се разрешуваат ефикасни и чесни министри, а во Владата остануваат министри кои не покажале резултати.
– За Драган Тевдовски може било кој што да каже, но сите знаеме дека е чесен. Драган Тевдовски има образ и е чесен. Не се согласувам со неговите политики и неговиот концепт, но во оваа Влада има барем 10-15 министри на кои местото им е да им се побара оставка. Цела оваа метла се сведе на тоа Драган Тевдовски да го изгуби ресорот, рече Ѓорчев.
За Заев, оставката и начинот на кој ја соопштил заменик министерот за образование Петар Атанасов е доказ дека има слобода во државата и е потег кој не можел да се замисли во времето на владеењето на ВМРО ДПМНЕ.
„Тоа што Бранимир Јовановиќ си замина и кажува зошто си заминува е доказ дека има слобода – секој може да се каже што сака. Вие Ѓорчев бевте сменети од Извршниот комитет на партијата зашто не гласавте за амнестијата, ако се сеќавам.
Не заборавајте дека вашиот лидер Груевски беше и премиер и министер и уредник во сите медиуми, беше и градоначалник на Скопје и на Центар, тој беше и претседател на Кривичниот суд, на сите судови“, рече Заев.
Претседателот на НДП Весел Мемеди, кој беше и потпретседател на Собранието вчера го врати пратеничкиот мандат и најави дека сите директори кои се предложени од НДП ќе се повлечат поради разрешувањето на министерот за локална самоуправа.