Лидерите на Европската Унија (ЕУ) вечерва на вонреден самит во Брисел за продолжување на процесот за кадровски пополнувања на водечки позиции во неколку тела и институции. Ова е трет нивни состанок по завршување на европските избори на кој треба да се постигне консензус за претставници на Унијата во наредниот петгодишен период.
Јавноста е во исчекување на номинација на кандидати за претседател на Европскиот совет, на Европската комисија, за шеф на дипломатијата и за претседател на Европската централна банка. На последната средба на 20 јуни, ниту еден од кандидатите не доби мнозинство гласови.
Во меѓувреме, продолжија консултациите меѓу лидерите на ЕУ и претставници на водечките групи во Европскиот парламент. Станува збор за комплексни преговори со кои треба да се усогласат различните позиции на земјите членки, Европскиот совет, Европскиот парламент, но и да се создаде рамнотежа меѓу водечките политички групи во Унијата, рамнотежа меѓу половите, при што се очекува дека барем на две од пет водечки позиции во ЕУ ќе биде жена, потоа географска рамнотежа меѓу кандидатите од западните и источните земји, како и меѓу големите и малите земји членки на ЕУ.
Предвидено е процесот на номинирање да заврши до инаугурацијата на новиот состав на Европскиот парламент чија прва седница е закажана на 2 јули во Стразбур.