Машката ватерполо репрезентација на Италија е нов светски шампион по победата над Шпанија со 10:5 (по четвртини: 2:2, 3:1, 3:1, 2:1) во финалето на СП во спортови на вода во Гвангжу, Јужна Кореја. „Азурите“ на тој начин стигнаа до четрвта мундијалска титула во историја, втора што ја освојуваат по триумф над шпанските колеги по онаа од 1994 година во Рим. Првата ја освоија во 1978 година, а на највисокото место на подиумот се искаќија и во 2011 година.
Бронзениот медал го освои Хрватска, чија селекција отпатува на СП 2019 како бранител на тронот. „Коцкестиот“ национален тим во мечот за третото место на турнирот ја порази Унгарија со 10:7. На петтото место, пак, заврши Србија по триумфот над Австралија со 13:9 додека Грција во натпревар за седмата позиција беше подобра од Германија со 11:6.
Со самиот пласман во финалето, Италија и Шпанија обезбедија настап и ватерполо турнирот на Олимоиските игри во Токио во 2020 година на кој сигурни учесници засега уште се Јапонија како домаќин, Австралија како шампион на Океанија и Србија како победник во Светската лига. По едно место ќе пополнат азиските квалификации во Алмати од 12 до 15 декември и европските во Будимпешта што ќе се играат од 12 до 26 јануари догодина.
Последните четири билети за ОИ 2о20 во Токио ќе бидат адресирани по светскиот квалификациски турнир од 29 март до 5 април.
СП во ватероло (м)
Финале: Италија – Шпанија 10:5
За трето место: Хрватска – Унгарија 10:7
За петто место: Србија – Австралија 13:9
За седмо место: Грција – Германија 11:6