Тенискиот „Роџерс Куп“ трофеј во машка конкуренција останува кај Рафаел Надал. Шпанецот загуби само три гема против Данил Медведев од Русија (6:3, 6:0) во финалето на турнирот во Монтреал за што е награден и со вредносен чек на 1,11 милиони долари.
За Надал ова е 35. Мастерс куп титула или вкупно 83 на АТП турот во професионалната кариера. До петтата победа на „Роџерс Куп“ стигна за 71. минута и сосема заслужено го прослави третиот освоен пехар во 2019 година по Рим и Ролан Гарос.
Со одбранетите 1.000 бодови во Канада, шпанскиот тенисер изби и на чело на годинашната АТП трка, но против Медведев, статистички, го забележа и најубедливиот триумф на турнирот по Џон Мекинро кој во 1984 година го декласира Витас Герулаитис со 6:0, 6:3. Надал во 2019 година е со биланс од 41 победа и шест порази и најави дека е во одлична форма пред стартот на Ју-Ес опен на 26 август.