Москва денеска понуди државјанство за околу три милиони Украинци од пограничниот регион со Русија што е погоден од воени судири. Потегот ги разлути Киев и Европската унија.
Рускиот претседател Владимир Путин уште оваа година ја почна програмата со цел забрзување на процесот за добивање државјанство за жителите на украинските региони Доњецк и Луханск, каде во последните пет години има судири меѓу украинската војска и проруските бунтовници, пренесува Хина.
Официјален Киев се закани дека ќе го одземе украинското државјанство на оние кои ќе земат руско, а ЕУ најави дека нема да ги признава руските пасоши добиени преку таа програма.
Судирот меѓу Украина и Русија почна во 2014 година откако Украинците го симнаа од власт прорускиот претседател и се завртија кон Запад. Според податоците на ОН, во судирите досега загина околу 13.000 лица.