Црвена звезда и Динамо Загреб ќе играат во групната фаза во Лигата на шампиони во сезоната 2019/20. Белградските „црвено-бели“ во плејоф двомечот го елиминираа Јанг Бојс со два нерешени исхода, но повеќе постигнати голови во гости. Српскиот првак вечерва на стадионот „Рајко Митиќ“ одигра 1:1 со ривалот од Берн и продолжува во елитното клупско друштво на УЕФА благодарение на ремито 2:2 во првиот меч во Швајцарија.
Алекса Вукановиќ во 59. минута погоди за водство на Црвена звезда, Јанг Бојс израмни во 82. минута со автоголот на Бен. За белграѓани ова беше осми меч во квалификациите за ЛШ летово, откако во претходните рунди ги мина Судува (Литванија), Хелсинки (Финска) и Копехнаген (Данска) за второ учество во низа во групите на најпрестижното клупско фудбалско натпреварување на стариот континент.
https://www.youtube.com/watch?v=29p2eeeuEb4
Дел од групите на шампионската Лига на УЕФА наесен ќе биде и тимот на Динамо Загреб кој во плејофот беше подобар од Розенборг. По триумфот со 2:0 на „Максимир“, хрватскиот првак вечерва одигра 1:1 во Трондхајм и си осигура место во ждрепката за ЛШ во четврток. Норвешкиот состав поведе во 11. минута со голот на Давид Акинтола, израмнувачкиот беше дело на Амер Гојак во 71. минута. Македонскиот репрезентативец Аријан Адеми, стандардно, одигра цел меч за Динамо Загреб.
Динамо Загреб, покрај Розенборг, на патот до групната фаза ги елиминира и грузиски Сабуртало Тбилиси и унгарски Ференцварош.
https://www.youtube.com/watch?v=EqSPhrD0mxM
Како учесник во групната фаза во ЛШ вечерва се најави и Олимпијакос. По победата на домашен терен со 4:0, грчката екипа славеше над Краснодар и на гостувањето во Русија со 2:1. Последните три екипи во ЛШ ќе бидат познати во среда по одигрување на реваншите Ајакс – АПОЕЛ, Бриж – ЛАСК Линц и Славија Прага – Клуж.
Плејоф за Лига на шампиони, реванши
Црвена звезда – Јанг Бојс 1:1 (2:2)
Розенборг – Динамо Загреб 1:1 (0:2)
Краснодар – Олимпијакос 1:2 (0:4)
Среда
Ајакс – АПОЕЛ (0:0)
Бриж – ЛАСК Линц (1:0)
Славија Прага – Клуж (1:0)
Во заграда се резултати од првите мечеви