Големата тениска тројка се раситни во Њујорк. Во четврт-финалето остана само Рафаел Надал и, според многумина, има отворен пат до 19. гренслем трофеј во кариерата. По повлекувањето на Новак Ѓоковиќ во осминафиналето, во топ 8 фаза е елиминиран и Роџер Федерер. Бугаринот Григор Димитров го доби Швајцарецот во маратонскиот меч во пет сета со 3:6, 6:4, 3:6, 6:4, 6:2 за судир со Русинот Данил Медведев.
Швајцарецот изрази разочарување по поразот. Влијание, можеби, имаа болките во грбот и вратот, но не сакаше премногу да зборува за тоа бидејќи, како што кажа, не сака да го „украде“ моментот на Димитров. Двапати водеше во сетови, бугарскиот тенисер двапати се враќаше, а пред решавачкиот сет Федерер побара медицински тајм аут по кој го извлече максимумот, но недоволно за триумф.
„Ми беше потребен третман на горниот дел на грбот и на вратот. Малку да се опуштам и да видам дали ќе биде подобро. Но, ова е момент на Димитров, ајде да не зборуваме за моето тело“, истакна Федерер.
Дел од неговите одговори на прес-конференција се протолкувани и како провокација за Новак Ѓоковиќ. Болките на Федерер добиле на интензитет попладнето пред мечот, но без оглед на нив, решил да излезе на терен и да игра.
„Попладнето пред мечот почувствував дека болките се зголемуваат меѓутоа проценив дека можам да играм. Не беше лошо да помислам да се предадам или нешто слично. Григор ме надигра додека јас се борев со она што го имам. Тоа е. Можев да играм, но моја грешка е што не победив. Тој играше добро од основната линија, менуваше удари и не дозволи да фатам ритам“, додаде Федерер.
Но, истакна дека не размислува ниту за пензија ниту за крај на сезоната. Ќе земе мал одмор, а потоа планира настапи на „Лејвер Куп“, во Шангај, во Базел, можеби Париз и на крај Лондон. „Засега таков е распоредот“, заклучи сопственикот на 20 гренслем титули во кариерата.
Резултати од четврт-финалните дуели на Ју-Ес опен
Мажи
Димитров (Бугарија) – Федерер (3., Швајцарија) 3:6, 6:4, 3:6, 6:4, 6:2
Медведев (5., Русија) – Вавринка (23., Швајцарија) 7:6, 6:3, 3:6, 6:1
Жени
Свитолина (5., Украина) – Конта (16., В. Британија) 6:4, 6:4
С. Вилијамс (8., САД) – Ванг (18., Кина) 6:1, 6:0