Швајцарија е позната по глечерите, а за само неколку години изгуби 500 од нив како последица на топење и влевање во реките, соопштија експерти. Нивото на реките засега е зголемено, но експертите се загрижени дека на долг рок, водата во реките ќе се намали и оти земјата ќе има проблеми со вода за пиење.
На една кривина на патот што води кон врвовите на Алпите во Швајцарија се наоѓа хотелот „Белведере“, изграден во 1880 година, кој нуди најдобар поглед на еден од најголемите глечери Роне. Хотелот е затворен затоа што глечерот се намали за повеќе од два километри и погледот повеќе не е атрактивен како некогаш.
„Никогаш не сме виделе толку брзо топење на глечери за 150 години, откако го следиме мразот на планините“, изјави Херман Хас, кој врши мерења на глечери во Швајцарија.
Експертите предупредуваат дека до крајот на векот, 90 проценти од глечерите ќе се стопат, односно ќе исчезнат, а сега се останати уште 1.500. Топењето на глечерите ќе влијае врз карпите кои ги покривале и тие ќе почнат да се одронуваат загрозувајќи ги патиштата, но и станбените населби кои ќе им се најдат на патот на одроните.