Ана Камчева, сопруга на Јордан Камчев, денеска сведочи за случајот „Рекет“. Таа беше прашана од обвинителката Вилма Русковска што се случуваше пред Камчев да оди во притвор.
„Половина час пред полноќ, Јордан Камчев се јави и ми рече да се симнам доле во куќата за да ми соопшти нешто. Во мојата куќа беше присутно и лицето Зоран Милески и ми рече дека во нашата куќа ќе се врши претрес во 6 часот наутро. Така и беше. Се правеше претрес во нашиот дом, потоа се правеше и во Орка Холдинг“, го почна Камчева своето сведочење.
Камчев беше изнесен на судија по претходна постапка во Судот по предметот „Империја“.
„Кога дојдовме во Кривичен суд, она што на што се сеќавам беше недоличното однесување на обвинителката Стефанова на која еден од бранителите Антонио Апостолски во ходникот му кажа: „Ништо не ми можеш Тони, моќта е кај мене, само треба да знаеш кога е кај тебе и да знаеш како да ја искористиш“. Подоцна бев известена од уште еден бранител во „Империја“ дека истата обвинителка Лиле Стефанова им се обратила и му препорачала да не биде бранител во „Империја“. Тоа правеше влијание на одбраната“, рече Камчева.
Ана Камчева сподели спомени и од првата средба со поранешната специјална обвинителка Катица Јанева.
„Се случи во домот на Јовановски во Орман. Се поздравив со неа. Разговорот го почнавме за децата пришто рече фала му на Боки, да не беше тој да го вработи син ми, сега ќе работеше на брод“, кажа Камчева.
На последното рочиште, што се одржа на 6 декември, сведочеше Јордан Камчев, кој во повеќе наврати рече дека обвинетиот Боки 13 пробал да го уценува со, според него, наместен предмет „Империја“ покренат од Специјалното јавно обвинителство (СЈО) и на нелегален начин да се стекне со поголема сума пари. Но, бизнисменот притоа откри и други лица и сподели многу информации.
Ден подоцна (7 декември) во јавноста беа споделени нови аудио записи преку Јутјуб за кои Јавното Обвинителство најави истрага.
На првото рочиште за „Рекет“, што се одржа на 3 декември, третообвинетиот Зоран Милевски-Кичеец беше осуден на три години затвор откако призна вина за случајот и предметот за него беше одвоен од оној против Јовановски и Јанева. Милески има право на жалба до Апелацискиот суд само во делот на висината на казната.