Очекувавме во своето прво обраќање, претстедателот Стево Пендаровски да се обиде да гради мостови, но очигледно тој сè уште не е излезен од чевлите на СДСМ и наместо да понуди мостови и помирување, успеа само да ги продлабочи поделбите. Ова е ставот на ВМРО-ДПМНЕ за обраќањето на претседателот Стево Пендаровски пред пратениците.
„Очигледно покомотно се чувствува кога ги зазема ставовите на партијата. Чувме многу празни зборови, но не слушнавме ништо конкретно. Чувме дијагнози, но не чувме конкретни решенија“, изјави пратенкот Илија Димовски од ВМРО-ДПМНЕ.
Посочи дека во говорот на Пендаровски не слушнале ништо во однос на неговите последни изјави за Гоце Делчев и иселувањето на младите.
„За неколкуте идеи што ги соопшти, мора да кажам дека нема никакви консултации со пратениците и опозоцијата што само потврдува дека тој не успеал да излезе од партиските чевли на СДСМ“, рече Димовски.
Жалиме, продолжи тој, за испревртените интерпретации на Венецијанската комисија. Посочи дека тие подале рака со нивното присуство денеска, но дека се разочарани.
„Одговорот на нашата проактивност не носи плод. Сакаме да му порачаме дека седум месеци се доволни за да излезе од својот партиски дрес. Време е да се постави како претседател на сите граѓани“, изјави Димовски.