Над 32.000 вработени во образованието и науката од 1 јануари ќе добијат повисоки плати за 10 проценти. Самостојниот синдикат на образование наука и култура (СОНК) и Министерството за образование и наука (МОН) претпладнево во Владата ја потпишаа Спогодбата што предвидува корекции на месечните лични доходи за околу 20.000 вработени во основното образование, 8.000 во средното, 4.500 во високото образование и 220 вработени во научните институции. Со ова, како што изјави министерот за образование Арбр Адеми, се подобрува материјалниот статус на вработените во образованието, но најави дека и во следниот период ќе се работи на подобрување на дигнитетот на наставниците и професорите.
Од СОНК се задоволни од постигнатото за покачување на платите, но она што останува да се сработи во наредниот период е потпишување на колективен договор за високото образование, измени на колективните договори за основно и средно образование, враќање на регресот за годишен одмор, враќање на надоместокот за превоз за наставниците, кои одат на работа во руралните средини и плаќање на прекувремената работа.
Токму тоа беше причина и за предупредувачкиот протест на првиот ден од оваа училишна година (1 септември), откако претходно двете страни не најдоа заеднички јазик за платите на просветните работници. Министерството за образование и наука во октомври предложи зголемување на платите на 10 отсто што требаше да стапи на сила од април во 2020 година. Тоа беше одбиено од СОНК кој побара зголемувањето на платите да биде од 1 јануари и истовремено најави генерален штрајк за 11 ноември, одлука што подоцна беше ставена во мирување до конечната одлука од МОН. Според Синдикатот, просечната плата на наставничкиот и професорскиот кадар во основното образование е 21.600 денари, а 22.500 денари во средното образование, додека помошно техничкиот пресонал има 13.000 денари плата.
„Како Влада и јас како премиер кој ја напушта функцијата оставам аманет до април, како што се договоривме, да ја направиме нивелацијата или структурната реформа во образованието. Реформата е многу значајна и ќе даде дополнителни шанси за унапредување и на квалитетот за работа на учениците, но и на наставаниците и професорите. Дајте се од себе да пренесеме колку што е можно повеќе квалитетно значење на учениците и студентите кое ќе им треба“, рече премиерот Зоран Заев по потпишувањето на Спогодбата помеѓу МОН и СОНК за покачување на платите во образованието.
Откако вчера стана јасно дека дека владејачкото мнозинство и опозициската ВМРО-ДПМНЕ постигнале договор за деблокирање на дел од законите во Собранието, а за утре е најавена средба меѓу премиерот Заев и лидерот на ВМРО-ДПМНЕ, Христијан Мицкоски се отвора патот за формирање на техничката Влада.
Премиерот Заев изминатите денови неколку пати најавуваше дека избори нема да има на 12 април, а тој нема да поднесе оставка, доколку опозицијата не ги одблокира законите од кои зависат платите, пензиите и инвестициите. Тој посочи дека избори во 2020 година ќе има, но дали тие ќе се одржат на 12 април ќе зависи од пристапот на опозицијата кон Собранието.