За двојно се зголемува вредноста на малите пратки што ќе подлежат на царина во земјата од досегашните 45 на 90 евра. Мерката стапува на сила од 1 јануари и во насока е на препораките на Европската комисија, но и во функција на зголемување на обемот на е-трговија. Како што соопштуваат од Министерството за финансии, ова е овозможено со измените на Уредбата на што претходеа анализи за царинење на малите пратки.
„Константни се барањата на граѓаните за зголемување на прагот на вредноста на стоки што подлежат на ослободување од плаќање царина“, изјави министерката за финансии, Нина Ангеловска на промоцијата на скенерот за контрола на поштенски пратки во царинската испостава „Пошта“.
Согласно податоците на Државниот завод за статистика, електронското купување во нашата земја во 2019 година е зголемено за 14 проценти, односно онлајн нарачките пораснале од 31,6 на 35,9 отсто. Исто така, годинава е зголемен и опфатот на домаќинства кои користат интернет за 81,8 проценти.
Прагот на царинење на мали пратки во земјите од Европската Унија е 150 евра. Граѓаните, пак, кои се враќаат од странство, со себе може да носат стоки во вредност од 350 евра и за нив да не платат увозни давачки.