Најсреќните 15 граѓани кои од 15 до 31 декември лани скенираа фискални сметки, синоќа добија по 100.000 денари на јавно извлекување на телевизија „Канал 5“, соопшти Министерството за финансии. Во првото коло на наградната игра „МојДДВ #МојаНаграда“ учествуваа 132.261 граѓанин, кои скенирале вкупно 5.398.855 сметки. Ова беше прво од 12 месечни извлекувања на 15 награди од 100.000 денари, со електронски генератор по случаен избор.
Шест од наградените се скопјани, по две „стотки“ завршија во Штип и во Велес и по една во Кавадарци, во Кочани, во Битола, во Вевчани и во Крива Паланка. Листата со добитници ќе биде објавена во рок од три дена од извлекувањето на интернет страницата на Државна лотарија.
По почетокот на „МојДДВ #МојаНаграда“ во декември се зголеми бројот на скенирани сметки и наплатениот ДДВ во однос на претходниот месечен просек од јули до ноември. Така на пример во декември бројот на скенирани сметки е за 53 отсто повисок во однос претходниот месечен просек, додека наплатениот ДДВ од фискалните сметки е за 59 отсто повисок.
Најмногу сметки на дневно ниво биле скенирани на 31 декември или 559.417 сметки. Тоа е двојно повеќе од просечното дневно скенирање на сметки, сметано од 1 јули. Ден пред новогодишната ноќ бил направен промет од 311.715.569 милиони денари или над пет милиони евра, за кој бил наплатен ДДВ во износ над 530.000 евра. Само за скенираните сметки на ден пред Новата година, граѓаните ќе добијат поврат на ДДВ од 15 проценти во износ од 80.000 евра.
Граѓаните кои учествуваат во наградната игра „МојДДВ #Моја награда“ не само што имаат можност да добијат една од 3.852 парични награди, со вкупен фонд од половина милион евра, туку и секои три месеци добиваат поврат на ДДВ и што е најважно, придонесуваат во борбата против сивата економија, истакнуваат од Министерството за финансии.