Отворање нови лекторати во странство и возобновување на постоечките, создавање електронски корпус на сите научни истражувања за македонскиот јазик, формирање Инспекторат за употреба на македонскиот стандарден јазик како посебна институција во рамките на Министерството за култура, вработување лектори во јавни институции, итн. Ова се само дел од одредбите во Предлог-законот за изменување и дополнување на Законот за употреба на македонскиот јазик за кој денеска се одржа јавна расправа.
Предлагач е Советот за македонски јазик, во координација со Министерствата за култура и за образование и наука. Според претседателот на Советот, Људмил Спасов, фактички се работи за нов закон зашто сосема поинаку и суштински ја разгледува употребата на македонскиот стандарден јазик во нашата држава, но и надвор од неа.
Во законот се предлага и на сите универзитети во нашата држава задолжително да се изучува македонскиот јазик во траење од два семестра, а во културните центри во нашите амбасади во странство да се изучува македонски јазик за сите заинтересирани во таа држава.
„Убаво е да има лектори во сите институции, државни и приватни, како и во сите медиуми за да не може младите генерации да учат по нечист текст, туку веднаш да го усвојуваат македонскиот јазик со усвојување на писмото, на азбуката“, рече Елена Јованова Грујовска, директорка на Институтот по македонски јазик „Крсте Петков Мисирков“ (ИМЈ).
Сугестија од ИМЈ е да постои тело за стандардизација што ќе ги решава јазичните дилеми, пред се на лекторите. Негова задача ќе биде да каже дали новите зборови се во духот на јазикот и дали тие може да се употребуваат.
За тоа како и дали се имплементира законот ќе се формира Инспекторат за употреба на македонскиот јазик. Стручни лица ќе ја надгледуваат употребата и ќе сугерираат доколку наидат на неправилности. Првиот човек на Советот за македонски јазик, Људмил Спасов, вели дека на оваа измена треба да се гледа како на позитивна политика.
„Инспекторатот е нормална работа. Идејата не е да се казнува по секоја цена, туку да се помага, да се усовршува, да не се прават непотребни грешки кои не зборуваат добро за сите нас. Значи, да бидеме покултурни, поиздигнати, со поафирмиран стандарден јазик“, изјави Спасов.
Според него стандардниот јазик е огледало, столб на државата.
„Нам ни претстојат евроатлантски интеграции и ние мора да излеземе како сите европски држави со чист и издржан стандарден јазик. Се надевам дека ќе создадеме закон кој ќе ги обедини сите, не само Македонците, туку и сите што живеат во државата, зашто во оваа смисла македонскиот јазик е обединувачки“, вели Спасов.
Тој, како што нагласува, не е во спротивност со Законот за употреба на јазиците, односно не се негираат еден со друг. Законот се изработувал две и пол години, а денеска истекува рокот за поднесување предлози за измените до Министерството за култура како негов основен предлагач.