Различни се прогнозите на македонското стопанство во однос на Брегзит. Според помалите фирми, излегувањето на Велика Британија од ЕУ, што и официјално се случи на 31 јануари годинава, може негативно да се одрази врз бизнисот и врз странските директни инвестиции. Големите компании се воздржани. Рано е, велат, за какви било оценки со оглед на претстојниот „транзициски“ период од 11 месеци во кој Британија и натаму останува дел од заедничкиот европски пазар и од Царинската унија.
„Во услови кога е фаза на дефинирање на трговски договор на државно ниво, бизнисот сè уште нема промени. Имајќи предвид дека преостанува период од 11 месеци, за очекување е дека бизнисот навреме ќе биде вклучен во активности што треба да произлезат за дефинирање на условите на водење бизнис“, кусо коментираат од Стопанската комора на Македонија.
Поконкретен е ставот на Сојузот на стопанските комори (ССК). За мала економија како нашата, нагласуваат од ССК, најзначаен е трговскиот канал за размена на стоки со британските компании. Оттука, ССК очекува да продолжат да важат актуелните билатерални и мултилатерални договори меѓу нашата држава и ЕУ, да се применуваат во билатералните односи со Обединетото Кралство за време на преодниот период до 31 декември во 2020 година и во кој треба да се дефинираат нови царини и други правила на игра.
„Прогнозите за Брегзитот се дека може да донесе некој вид рецесија во британската економија и да има неповолни ефекти врз динамиката и обемот на економската активност. Ефектите врз нашата земја ќе зависат најмногу од ефектите врз ЕУ, како наш најзначаен трговски партнер. Негативен ефект може да почувствуваме преку нашите трговски партнери од ЕУ. Ако нивната економија затаи, тогаш може побарувачката од тие држави да биде помала. Исто така, доколку се наруши финансиската состојба меѓу финансиските посредници во ЕУ по излегувањето на Велика Британија, може да има негативни ефекти врз странските директни инвестиции“, истакнуваат од ССК.
„Освен последиците што ги доживува и ќе ги доживува британската економија, европските земји, исто така, ќе страдаат, бидејќи британската економија е една од најголемите во светот и доколку не се постигне договор меѓу ЕУ и Обединетото Кралство, тоа ќе значи дека извозот и увозот ќе бидат подложени на плаќање царина. Истото може да важи и за нашата држава, бидејќи Брегзитот без договор со ЕУ ќе ја направи земјава трета страна спроти Велика Британија. Велика Британија е 11-та земја со која имаме најмногу трговска размена во рамките на извоз и 19-та кога се зборува за увоз. Сметаме дека треба да се регулираат односите со неа во форма на билатерален договор за слободна трговија доколку првичниот договор со ЕУ не се финализира“, посочуваат од СКСЗМ.
„За нашите бизниси, најголем предизвик е евентуалниот пад на вредноста на фунтата и тоа е нешто за што треба да бидат претпазливи нашите компании што извезуваат во Велика Британија“, потенцираат од СКСЗМ.
