Published: Monday, March 9, 2020 13:21
Со воведни зборови на одбраната и обвинетите, во Кривичниот суд продолжи судењето за организаторите на насилствата во Собранието од 27 април во 2017 година. Иако на претходното рочиште беше најавено, сепак, денеска не сведочеа техничкиот премиер Оливер Спасовски и Михаил Младеновски, еден од обвинетите за насилствата во законодавниот дом, бидејќи немале уредни покани.
Адвокатот Еленко Миланов, кој ги брани обвинетите Трајко Вељаноски, Миле Јанакиески и Спиро Ристовски, во воведните зборови истакна дека уставниот поредок на државата на 27 април не бил загрозен, како што се наведува во обвинителниот акт. Тој истакна дека во текот судењето ќе докажел дека никој од обвинетите не организирал и не повикал на насилства во Собранието на 27 април 2017 година.
„Ќе докажеме дека постапување на претседател на Собранието, не може да биде сторено кривично дело“, рече адвокатот Миланов.
Според него, комуникацијата меѓу претседателот на Собранието, во овој случај Трајко Вељаноски и неговиот вработен не може да биде инкриминиран акт. Импулсивната реакција на пратеникот Зекирија Ибрахими, како што наведе адвокатот Миланов, е последниот камен од мозаикот, односно мирните протести ќе продолжеле и на 27 април, исто како и на 21 и 26 ако не била неговата реакција.
„Него го нема во диспозитивот на обвинението, освен во листата на докази на одбраната. Ќе се докаже како и на кој начин овој пратеник изреагира“, кажа Миланов.
Одбраната на обвинетите за организаторите на „27 април“, исто така, нагласи дека ќе докаже оти немало организиран превоз на граѓани од страна на Спиро Ристовски и Миле Јанакиески.
„Ќе докажеме дека Спиро Ристовски и Миле Јанакиески, во ниту еден момент не биле во ниту една базна станица со лицето Александар Василевски–Нинџа, кој изјавил дека видел и слушнал како Спиро и Миле организираат некого во штабот“, рече Миланов.
Обвинетиот Трајко Вељаноски, во својот воведен говор рече дека оваа обвинение е по нарачка на извршната власт, односно дека Обвинителството за гонење на корупција и организиран криминал, е инструмент за уценување, исто како и СЈО.
„Ќе докажам дека конститутивната седница на 30 декември ја закажав согласно Уставот и Правилникот на Собранието. Претходно на 29 декември имав состанок со пратеници на СДСМ, на БЕСА, на ДУИ и на Алијанса за Албанците. Од 30 декември до 27 март, немав основа за закажување на конститутивната седница. Вакво барање добив на 17 март, односно во текот на февруари и март немаше барање за конститутивна седница“, рече Вељаноски.
Поранешниот претседател на Собранието, сега обвинет за организирање на насилствата на 27 април, Трајко Вељаноски, кажа дека пратеникот Зекирија Ибрахими ќе го предложи за негов сведок.
„Пратеникот Зекирија Ибрахими во својот говор пееше на албански. Јас не бев запознаен што пееше, траеше 20 секунди и немаше превод. Ќе докажам дека на пратеникот не сум му дал збор преку ред како што тврди Обвинителсвото. Обвинителството ако сакало да ја знае вистината ќе го сослушало лицето Зекирија Ибрахими“, додаде Вељаноски.
Тој и на првото рочиште минатата недела, се изјасни како невин, а вина негираа и другите обвинети во предметот „организатори на насилствата во Собранието на 27 април“, Спиро Ристовски, Миле Јанакиески и Владимир Атанасовски. Обвинителката Вилма Рускоска, пак, тврди дека ќе докаже оти обвинетите изготвиле план со намера за загрозување на уставниот поредок и безбедноста на државата со акти на насилство за да спречат мирно примопредавање на власта, што резултира со насилствата на 27 април во 2017 година.