Published: Thursday, April 16, 2020 12:03
Градоначалникот на Куманово, Максим Димитриевски се огласи на Фејсбук во кој истакна дека е позитивен на ковид-19. Заедно со него, како што стои во постот, позитивни на коронавирусот се уште 40. негови сограѓани од Општината.
„Добив најнови резултати за новите позитивни лица во Куманово, вкупно четириесет мои драги соѓраѓани помеѓу кои сум и јас. Ве охрабрувам заедно и дисциплинирано да продолжиме во борбата против оваа заедничко зло. Знам дека ќе го победиме, убеден сум во тоа, ве молам за воздржаност, нема простор за паника. Барам од вас дисциплина, почитување на мерките и препораките за социјална дистанца“, се наведува во дел од неговата порака до социјалната платформа.
Тој упати молба до жителите на Општина Куманово за почитување на мерките, за избегнување на блиски контакти, бидејќи, како што нагласи, здравјето е најважно и само така може да се победи пандемијата.
„Нема простор за паника, ОШЗС ќе продолжи со својата работа во борба против коронавирусот по препораките на епидемиолозите и стручните лица“, додаде Димитриевски.
Кумановскиот градоначалник вчера одржа состанок со општинскиот Кризен штаб на кој присуствуваа и премиерот Оливер Спасовски, вицепремиерот Бујар Османи, министерот за здравство Венко Филипче, министерсот за образование и наука, Арбер Адеми и претседателот на Комисијата за заразни болести, Жарко Караџовски.