Вредноста на акциите на европските берзи денеска почна да бележат раст по информациите за пад на стапката на смртност од ковид-19 во Италија и во Шпанија. Но, инвеститорите, сепак, се внимателни при тргувањето во исчекување на најлошите квартални извештаи за профит на компаниите по финансиската криза во 2008 година.
Паневропскиот STOKS 600 индекс, утрово во 7:01, забележа скок за 0,4 отсто, откако во петокот беше „заклучен“ со највисок двонеделен процентен раст од 2015 година, пренесува агенцијата „Ројтерс“. Вкупната негова вредност, сепак, е 23 отсто пониска од рекордното ниво што беше регистрирано во февруари.
Проценките на аналитичарите се дека компаниите од STOKS 600 индексната кошничка ќе објават пад на заработувачката од 22 отсто, наместо растот што претходно го предвидуваа, покажуваат податоците на агенцијата „Рефинитив“ која прибира финансиски показатели.
Холандската компанија „Филипс“, на пример, ја повлече првобитната прогноза за работењето во 2020 година, бидејќи ковид-19 „откина“ голем дел од нејзините приходни проекции за првиот квартал оваа година. Сепак, нејзините акции пораснаа за 2,7 отсто на денешното претпладневно тргување.
Акциите, пак, на францускиот конгломерат „Вивенди“ скокнаа за 4,5 отсто, откако пријави поголеми приходи за првото тримесечје во оваа година. Најголем придонес во тоа е припишан нејзината компанија „Универзал“ која работи во музичкиот сектор.