„Полицискиот час“ да почнува во 19 часот и да трае до пет часот наутро, истакна министерот за здравство Венко Филипче на денешната прес-конференција. Предлогот за ново времетрање на ограничувањето на движење на граѓаните во работните денови, како што рече, ќе биде доставен до Владата.
Скратен „полициски час“, како дел од планот за релаксирање на мерките, е предложен и за деновите во викендот. Новата мерка би почнала во сабота во 13 часот и би завршила во пет часот наутро во понеделник. Со нив, потенцира Филипче, граѓаните ќе добијат плус часови, но ќе се намали и притисокот при набавка на неопходните намирници.
Филипче нагласи дека се планира и продолжување на времето за движење на граѓаните кои се повозрасни од 65 години. Па, наместо досегашните два часа, оваа категорија на лица во наредниот период би добиле дополнителни два, од 8 часот наутро до 12 напладне. За лицата, пак, на возраст до 18 години е предвидено да добијат час повеќе, па наместо од 13 часот до 15 часот како што беше досега, ќе може да се движат надвор од своите домови во работните денови до 16 часот.
Министерот за здравство изрази задоволство од начинот на кој се справуваат со ковид-19 во земјава што го образложи со линеарниот број на заболени се движи линеарно, па затоа и предлозите до Владата за скратување на т.н. „полициски час“.
Филипче притоа истакна дека забраната за социјална дистанца ќе остане на сила и потенцира дека луѓето ќе мора да носат заштитни маски во сите затворени простории, како банки, маркети, пошти, чекалници. Кога ќе се движат на отворено, не мора да се носи заштитна маска, освен кога нема да може да се одржи дистанцата од два метра, како на пример на пазарите.