Published: Sunday, April 26, 2020 11:55
Целиот систем на функционирање на ВМРО-ДПМНЕ е поставен врз креирање лажни вести и пласирање невистинити информации со кои само и штетат на државата и на граѓаните, се вели во соопштението на СДСМ.
„Иако ваквиот антидржавен модел е прочитан од сите граѓани, ВМРО-ДПМНЕ не се откажува од принципот да создава погрешен впечаток во јавноста со лажни вести. Во време кога државните капацитети се фокусирани на справување со коронавирусот и на имплементирање на економските мерки за полесно надминување на кризата, Христијан Мицкоски јавно тврдеше дека јавното здравство има уште само 100 тестови за ковид-19. Оттогаш изминаа три седмици и се направија илјадници тестови, што значи дека реалноста ги демантираше лагите на ВМРО ДПМНЕ“, стои во дописот на владеачката партија.
Од таму потсетуваат и на „тврдењата на Александар Николовски дека Обединетите нации лошо ги оцениле владините мерки за справување со кризата“ за потоа да стигне реакција од Организацијата во која беше наведено дека „воопшто не дискутирала за мерките во Северна Македонија, а не пак да дала некаква оценка“.
Истото, велат од СДСМ, се случи и со тврдењата „дека официјална Софија го проблематизира почетокот на преговори на нашата држава со Европската Унија“ на што следуваше демант од Брисел „дека едностраната изјава на Бугарија не ги менува заклучоците на Советот за општи работи на ЕУ за отворање на преговорите што беа поддржани и од Европскиот совет“.
„Сите овие лаги на ВМРО-ДПМНЕ, исто како и онаа дека 140.000 работници добиле откази за време на кризата, иако реалноста е сосема поинаква, се случуваат во време на глобална пандемија со што партијата во континуитет демонстрира антидржавна политика“, нагласуваат од СДСМ.
Владеачката партија потсетува дека „за две и пол години преку одговорни политики, успеа да ја врати државата на европските патеки и да покаже резултати кои ВМРО-ДПМНЕ не можеше да ги замисли. Единствено што направија за 11 години е целосна изолација на државата на меѓународен план и владеење со криминал и корупција“.