Вицепремиерката и министерка за одбрана Радмила Шекеринска порача дека избори треба да се организираат час поскоро, доколку состојбата со епидемијата на коронавирусот го дозволува тоа. Таа денеска беше во посета на Неготино, каде направи увид во реконструкцијата на патниот правец Криволак – Пепелиште, при што истакна дека здравјето е пред сè, а се останато е бркање политички интереси.
„Ако епидемијата ни даде шанса, час поскоро треба да организираме избори, одговори Шекеринска на прашање околу лидерската средба и датумот за избори.
На лидерската средба, нагласи таа, не треба да се лицитира со датуми, туку треба да се носат одлуки што ќе бидат во полза на државата и на најголем број на граѓаните.
„Ние од самиот почеток на епидемијата, со брза и ефикасна реакција покажавме дека животот и здравјето немаат цена. И затоа бевме една од првите држави што воведовме мерки кои нè спасија од сликите кои ги гледаме во Италија или во Шпанија или во некои други држави. Не бевме слепи пред опасноста и не теравме политика, иако и тогаш беа закажани изборите. Покажавме дека здравјето навистина ни е пред сè. Водиме сметка дека државата денеска функционира за жал, без Собрание. И ние како Влада покажавме демократски капацитет дека не сакаме да ја злоупотребуваме оваа состојба за да имаме неограничени права и да немаме контрола. Затоа сметаме дека во прв момент кога тоа ќе ни го дозволи епидемијата, треба да искористиме шанса“, додаде Шекеринска.