Иранската армија објави дека 19 морнари загинаа, а 15 се ранети кога иранска ракета по грешка погоди брод на сопствената морнарица кој учествувал во воена вежба во Оманскиот залив. Иранската телевизија претходно јави дека во инцидент со „пријателски оган“ што се случил вчера попладне загина едно лице, а 15 се повредени.
„Во неделата попладне за време на вежба на одреден број на бродови на воената морнарица во водите Јаск и Шабахар на југоистокот, полесниот брод за поддршка „Конарак“ имаше несреќа“, се наведува во соопштението на иранската војска објавено на интернет и се додава дека билансот е „19 маченици и 15 повредени“, пренесува агенцијата „Франс прес“.
Според иранските медиуми, инцидентот се случил додека фрегатата „Јамаран“ тестирала нов проектил против бродови кој го погодил логистичкиот брод „Конарак“.
„Конарак“, како што се наведува во извештаите, бил премногу блиску до метата за време на вчерашната вежба. Инцидентот се случил во близина на пристанишето Јаск на 1.270 километри југоисточно од Техеран во Оманскиот залин, пишува агенцијата АП. Иранб редовни извршува воени вежни во тој регион кој е на влез во Персискиот залив каде се наоѓа 20 отсто од светската нафта. Петтата флота на морнарицата на САД, која го надгледува тој регион, досега не излезе со коментар за настанот.
Неофицијалната верзија за инцидентот е дека од „Јамаран“ бил прерано испален проектилот при што „Конарак“, кој ја влечел метата, немал доволно време да се оддалечи.