Институтот за трансфузиона медицина денеска пушти во употреба нов клеточен сепаратор за плазмаферза. Апаратот е набавен со сопствени средства на Институтот и во претстојниот период ќе се користи за донирање ковалесцентна плазма.
„Во време кога сè уште се соочуваме и се бориме со ковид-19, апаратот ќе се користи за донирање на ковалесцентна плазма, а по завршување на пандемијата ќе се користи за донирање на стандардна плазма и тромбоцити. Ковалесцентна плазма може да дарува лице кое има оздравено од коронавирусот. Со клеточниот сепаратор, значително ги зајакнуваме капацитетите на нашиот Институт“, истакна директорот на Инстутот за трансфузиона медицина, Седула Усеини.
На Клиниката за инфективни болести и фебрилни состојби се излекувани пет пациенти со крвна плазма.
„Задоволен сум што целиот труд, мерки, грижа на здравјето на пациентите даваат резултати. Сите јавно-здравствени установи се на ниво на задачата. Покажавме стручност, спремност и мобилизираност за заштита од оваа непозната болест и не го оптоваривме нашиот здравствен систем. Имаме поголем број на излекувани пациенти, отколку на заразени. Голема благодарност до сите оздравени пациенти кои донираа крвна плазма и апелирам до сите кои можат да донираат, да го сторат тоа за спасување на човечки животи и надминување на оваа здравствена криза“, потенцира министерот за здравство, Венко Филипче.