Од понеделник (1 јуни) престануваат да важат ослободувањата од работни обврски и се очекува вработените во јавната администрацијата да се вратат на своите работни места. Ова е една од мерките за кои се донесена на денешната седница на Владата, меѓутоа од неа се изземени хронично болните и оние кои имаат деца на возраст до 10 години додека градинките не почнат со работа.
Новитет од владината седница е, исто така, и заменувањето на задолжителниот државен карантин со домашна изолација.
„Задолжителниот карантин се заменува со државна изолација, доколку лицата приложат негативен тест на коронавирус од последните 72 часа пред влез во земјата. Истото се однесува и на сите лица кои моментно се наоѓаат во државен карантин. Тие ќе можат да се тестираат на сопствен трошок и во случај на негативен резултат, ќе може да продолжат во изолација во домашните услови“, истакна премиерот Спасовски.
Премиерот притоа истакна дека ја задолжила Комисијата за заразни болести да направи проценка за отворање на државните граници и да направат протокол за влез и излез од земјата, како и за работа на хотелските објекти.
Мерката „полициски час“ за првпат беше воведена на 22 март, четири дена по првата одлука за вонредна состојба на претседателот Стево Пендаровски. Во воведниот период почнуваше од 21 часот и траеше до пет часот наутро, а потоа се менуваше во зависност од епидемиолошката состојба во државата. Па, добар период почнуваше во 16 част, за потоа да биде поместена од 19 часот.