По тримесечна блокада поради пандемијата на коронавирусот, Италија од денеска ги отвора регионалните граници со што овозможува поголема слобода на движење за повеќе од 60 милиони жители во земјата, а се дозволени и пристигнувања од Шенген-зоната без карантин.
Регионалните граници се отворени уште на полноќ и покрај спротивставените ставови на италијанските власти за Ломбардија, регион што беше најтешко погоден со ковид-19. Одредени области во Италија, сепак, ги засилуваат контролите и мерките за спречување на ширењето на вирусот преку „следење на туристите“ со дигитални апликации, мерење на температурата со термички скенери, итн.
Ломбардија, Венето и Лигурија побараа целосно враќање во нормала, Тоскана побара уште една недела чекање, Кампања ја критикуваше одлуката за отворање на границите, а Сардинија најави „здравствени пасоши“ за пристигнување на туристите, што министерот за регионални работи, Франсоа Боа, го смета за неуставно.
Забраната за собири и обврската за безбедно растојание меѓу луѓето е сè уште на сила во Италија со цел да се спречи ширењето на ковид-19 во земјата во која починаа над 33.000 лица. Употребата на заштитна маска е задолжителна во затворен простор, вклучително и во јавниот превоз, а во регионите Ломбардија, Трентино, Фриули-Венеција, Пулија, Кампања, но и во градот Џенова маските се задолжителни и на отворено. На железничките станици телесната температура на патниците ќе се мери со термички скенери, а доколку е над 37,5, нема да им биде дозволено да патуваат со воз.
Во Италија продолжуваат да работат 24. аеродроми, пристигнувањето е дозволено од 26 држави и тоа без карантин, додека пристигнувањата од земјите надвор од Шенген-зоната ќе бидат дозволени од 15 јуни.
Италија е прва земја во Европа што воведе карантински мерки на целата територија на почетокот на март, а со првично олеснување на рестриктивните мерки почна од 4 мај. По денешното отворање на границите, за 15 јуни е најавено и отворање на кината и на театрите, а училиштата и стадионите ќе останат затворени.
Повеќе од 233.000 лица во Италија се заразија со ковид-19 од почетокот на кризата, а во моментот има околу 39.000 активни случаи.