Полицаецот од Атланта, кој минатата недела пукаше во Афроамериканецот Рејшард Брукс на паркинг пред еден ресторан за брза храна, е обвинет за кривично дело убиство, соопшти окружниот обвинител на американската сојузна држава Џорџија, Пол Хауард Џуниор, пренесува „Дојче Веле“.
Смртта на 27 годишниот Брукс, последната жртва на долгиот список Афроамериканци кои ги убиле полицајци, дополнително ги заостри расните тензии во САД во момент кога ширум земјата се одржуваат протести против расизмот и полициската бруталност, поттикнати од убиството на Афроамериканецот Џорџ Флојд на крајот на мај во Минеаполис.
Полицаецот Герет Ролф, кој го уби Брукс на 12 јуни и наредниот ден доби отказ бидејќи инцидентот го снимија безбедносни камери, е обвинет за убиство сторено во рамки на кривично дело и за напад со смртоносно оружје, изјави обвинителот на округот Фалтон, Паул Хауард, на конференцијата за новинари во Атланта.
Герет Ролф се соочува со вкупно 11 обвинувања, а ако биде прогласен за виновен, би можел да биде осуден на смртна или доживотна затворска казна. Афроамериканецот Рејшард Брукс заспал во автомобилот во близината на еден ресторан за брза храна во Атланта, што им оневозможило на други возила да минат, па била повикана полицијата.
Како што се гледа на снимките што се проширија преку социјалните мрежи, Брукс мирно разговара со полицајците, а кога сакааат да му стават лисици бидејќи утврдиле оти е во алкохолизирана состојба започнал да бега. На еден од полицајците му ја одзел направата за електрошокови, а еден од нив, инаку белец, испукал три куршуми и смртно го застрелал, што потврди и аутопсијата.
Девин Броснан, друг бел полицаец кој бил присутен, ќе соработува со обвинителот, изјави Паул Хауард. Аутопсијата покажа дека Брукс е погоден двапати во грбот и оти починал поради крварење и повреда на внатрешните органи.
