Премиерот Оливер Спасовски апелира на дијалог во населените места во Општина Боговиње како начин за изнаоѓање на заедничко прифатливо и добро решение за сите со цел и граѓаните на Синичане да добијат вода за пиење што е можно побрзо. За мене, наведува тој во објавата на Фејсбук, единствено што е важно е да се постапува по закон и Устав и да не се дозволи да имаме анархија и постапување вон законските прописи.
„Ги почитувам и поддржувам нашите сограѓани од Општина Боговиње и многу е важно да имаме решение на нивниот проблем што ќе дојде низ законски рамки. Апелирам низ дијалог во населените места во Општина Боговиње се изнајде заедничко добро решение за сите и граѓаните на Синичани да добијат што е можно побрзо вода за пиење“, напиша премиерот Спасовски на својот Фејсбук профил.
Истовремено во објавата демантира дека со обвинителката Лејла Кадриу водел разговор поврзан со граѓаните на Синичане. Вели дека обвинителката, која постапува по случајот, му се јавила, но оти во тој разговор воопшто не станало збор за граѓаните, туку, како што вели, само и посочил дека нема потреба да го бара оти има јавен обвинител и оти со него треба да се разговара.
Полицијата по добиени сознанија за изградба на водоснабителен систем во тетовското село Синичане, вчера излегла на терен при што се прибавени податоци и информации и до Основното јавно обвинителство Тетово е поднесено известување за сомнение за сторено кривично дело „бесправно градење“.
Портпаролот во Министерството за внатрешни работи (МВР), Тони Ангеловски денеска изјави дека присуството на полициски службеници на местото каде што се почнати работни активности за изградба на водоснабдителниот систем е во функција на обезбедување на јавниот ред и мир.
Што се однесува до координацијата и соработката со Јавното обвинителство, тој нагласи дека МВР соработува со обвинителството во сите случаи, како и во овој случај околу истрагата што ја води обвинителството.
Случувањата во тетовско околу почеток на изградба на водовод ќе ги испитува и Јавното обвинителство на Република Северна Македонија (ЈОРСМ). Оттаму попладнево информираат дека Вишото јавно обвинителство ќе го испитува предметот, како и постапувањето на тетовската обвинителка Лејла Кадриу.
„Поради различни информации во медиуми и на социјални мрежи за учеството на јавниот обвинител од Основното јавно обвинителство Тетово, Лејла Кадриу на место на кое се изведувале работи на водовод во тетовско и повеќе нејаснотии во нејзиното постапување, Јавниот обвинител на Република Северна Македонија денеска писмено побара од Вишото јавно обвинителство Гостивар да изврши увид во предметот, врз основа на член 27 став 5 и член 28 став 1 од Законот за јавно обвинителство“, се вели во соопштението.
По извршениот увид, Вишото јавно обвинителство Гостивар треба веднаш да достави информации, а по приемот и анализата на добиената информација, Јавниот обвинител на Република Северна Македонија ќе донесе соодветна одлука, посочија од ЈОРСМ.