Либанското знаме ја покри фасадата на градското Собрание на Тел Авив на плоштадот „Јицак Рабин“ во ретката израелска демонстрација на солидарност со Бејрут по вчерашната разорна експлозија.
Агенцијата „Ројтерс“ известува дека знамето е истакнато и покрај тоа што Израел и Либан технички се сè уште во војна што трае со децении, иако Израелците за најголем непријател ја сметаат муслиманската шиитска вооружена група Хезболах што ја поддржува Иран. Градоначалникот на Тел Авив, Рон Хулдај, сепак, изјави дека „хуманоста е пред секаков друг конфликт“.
На тој начин, Тел Авив се придружи на градовите кои со идентични или слични гестови изразија солидарност со Либанците кои веќе оплакуваат 115 лица, а бројот на жртвите од стравичната експлозија постојано расте. Во боите на либанското знаме осамнаа и кулите во Кувајт, а меѓу првите фотографии на социјалните мрежи беше и пирамидата во Гиза во знак на солидарност на Египет со Либан.
Ноќ по експлозијата на градското пристаниште во Бејрут, либанското знаме заврши и на познатата Бурџ Калифа во Дубаи, на најпознатиот хотел во Доха, како и еден од најпознатите симболи на Техеран.