Предлог законот за легализација на бесправно изградените објекти ќе ги опфати само објектите на социјално загрозените категории, дознава НОВА ТВ. Предлог законот предизвика бурни реакции во јавноста, претседателот на државата Стево Пендаровски одби да го потпише и законот сега повторно ќе треба да се најде пред пратениците. НОВА ТВ од свои извори дознава дека овој Закон пред да стигне на пленарна седница за гласање ќе претрпи измени така што крајното законско решение ќе ги опфати само дивоизградените објекти на граѓаните во социјален ризик.
ДКСК вчера организираше онлајн јавна дебата за уредување на правниот статус на бесправно изградените објекти. На дебатата беа донесени повеќе заклучоци меѓу кои да се повлече актуелниот Предлог закон за легализација на бесправно изградените објекти, да се направи попис и категоризација на дивоградбите за да се утврди нивниот точен број, па потоа да се изработи ново законско решение во кое точно ќе се прецизира кој и каков објект, како и каде и под кој услови ќе може да се легализира.
Претседателката на ДКСК, Билјана Ивановска не крие оти Комисијата била изненадена кога Законот бил изгласан во Парламентот.
„На овој закон му претходеше плодна дебата за Националната стратегија за борба против корупцијата и во долет за градежништво и урбанизам токму го наведовме ризикот од постоење на овој Закон и препорачавме што побрзо да се ограничи неговата примена. Сега Законот е вратен во собраниска процедура и оценуваме дека сега е поволен момент да се слушне професионалната јавност во Македонија. Од тие причини ја организиравме дебатата и сме многу задоволни. На дебатата покрај претставници на стручната фела учествуваа членовите на ДКСК, луѓе од невладините организации, од министерствата за транспорт и врски и за животна средина и просторно планирање и ЗЕЛС, како и правни експерти од областа на судството и високото образование, судии. Од самата дискусија се утврди дека тој Закон не е усогласен со Уставот, заради тоа што не овозможува владеење на правото ниту пак ја заштитува животната средина“, изјави во Утрински брифинг, Билјана Ивановска.
Учесниците на јавната дебата побарале итно повлекување на законското решение, особено поради фактот што согласно процедурите остануваат само 30-тина дена за измени на постојното законско решение пред Собранието повторно да го разгледа, кои според учесниците на дебатата не се доволни за да се спроведе јавна расправа и да се вметнат сите забелешки од стручната фела.
„Ние гледаме дека со овој Закон на една страна сите оние граѓани кои што имале дозвола за градба, ги почитувале сите процедури, си платиле комуналии, сега тие стануваат граѓани од втор ред, затоа што сите оние кои што граделе бесправно, па дури што им се започнати постапките, ќе им се стават настрана значи бесправото станува право. Јас сметам дека со ваков Закон ние ја покриваме целата слабост на инспекциските служби. Дали општината немала инспектор, дали бил со несоодветно образование, дали тој затаил, дали дал решение за рушење па не се спровело, не е важно, важно не се спровело како што треба. Имаше и добри предлози – дека постои проблем – постои, дека треба да се реши, треба да се реши, но прашањето е како. На тоа прашање имаше добри предлози од фелата. Се кажа дека треба да се направат критериуми, да се направи инвентаризација, секоја општина со какви дивоградби располага“, вели Ивановска.
За дивоградбите да станат легални гласаа 72 пратеници и од власта и од опозицијата. Шефот на државата, Стево Пендаровски не го аминува Законот со објаснување дека текстот е во спротивност со некои од темелните вредности на Уставот.