Трагични вести пристигнаа од Охрид, откако утрово во Охридското езеро е пронајдено безживотното тело на голманот Никола Даниловски, објави охридската полиција, јавува Гол.мк.
24-годишникот бил член на ракометниот клуб Охрид, а според информациите од охридската полиција, телото било пронајдено кај местото Лагадин. Немало траги од насилство, па засега не се познати причините за смртта.
Даниловски исчезнал синоќа. Тој не присуствувал на тренингот на Охрид и бил недостапен на телефон, а доцна во ноќта полицијата почнала потрага по него.
За жал, утрово е потврдено дека пронајденото тело во езерото е на младото момче.
Младиот голман потекнуваше од школата на Металург, ги бранеше боите на тимот од Автокоманда, кратко беше и во Пелистер, а беше дел од младинските селекции на Македонија и доби неколку репрезентативни повици со сениорите.
Поради трагичната смрт на Даниловски, одложен е вечерашниот меч од Суперлигата во ракометната лига на Македонија, меѓу Охрид и Струга.