Министерот за здравство Венко Филипче во синоќешното гостување во емисијата „Само вистина“ на ТВ Канал 5 рече дека епидемиолошката слика во земјава е добра и нема простор за загриженост кај граѓаните и воедно дека нема ризик за организирање на семејни прослави и културни настани во текот на ова лето.
– Засега треба да сме спокојни. Заради тоа се и попуштањата на мерките. Но, треба да бидеме претпазливи, бидејќи овој вирус е непредвидлив. Будно ја следиме состојбата. Важно е дека и покрај тоа што има одредени бранови во некои земји, нема смртни случаи. Вакцината штити од тешка форма на болеста и смрт. Ако продолжиме со ова темпо, полицискиот час ќе се укине, а се очекува да имаме концерти ова лето, семејни прослави. Нема ризик за организирање на такво нешто, нагласи министерот Филипче.
И вчерашната ковид-статистика говори за стабилизирање на пандемијата. Вчера беше регистрирано само едно починато лице, 18 новозаболени од 2.411 тестови и 31 оздравен пациент. Во болниците моментно се сместени 121 пациент со ковид-19, од кои 48 лица во главниот град, и има околу 500 слободни болнички кревети.
Во Скопје вчера имало вкупно три приеми од кои два во ковид центарот во ГОБ „8 септември“ и еден на Клиниката за инфективни болести и фебрилни состојби.
Во болницата во Битола се хоспитализирани седум ковид-пациенти, во Штип пет лица, во Тетово се лекуваат двајца пациенти со ковид-19, во Велес се лекуваат – 11, а во Куманово 15 пациенти. Во Охрид се хоспитализирани седум пациенти, во Прилеп тројца, во Гостивар осум, а во Струга четири болни. Во болницата во Струмица се хоспитализирани девет пациенти, во Кичево двајца, а во Кавадарци и во Гевгелија нема хоспитализирано позитивни и суспектни лица на коронавирусот.
Досега во земјата се направени вкупно 823.776 тестирања на ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 155.487, бројката на оздравени пациенти е 149.582, на починати е 5.468, а бројот на активни случаи изнесува 437.
Од активните случаи, најмногу ги има во Скопје – 208, потоа следи Куманово – 50, Прилеп – 32, Тетово – 20, Кичево – 20. Во другите градови се под 20. Шест града се без активен случај и тоа: Кавадарци, Пробиштип, Богданци, Демир Капија, Пехчево и Дојран.