За Нова ТВ од Букурешт: Сашко Ѓ. Димовски
Не можам да кажам дека Австријците беа толку поквалитетни од нас, примивме два наивни гола од шанси што ние им ги подаривме. Одигравме добри 70 минути, но мора да останеме фокусирани во текот на сите 90, истакна напаѓачот на Мајорка и на македонската репрезентација, Александар Трајковски во анализата по поразот од Австрија во воведниот меч на 16. Европското фудбалско првенство.
– Чувството да се биде дел од едно вака големо натпреварување е прекрасно. Прекрасно е што дојдоа да нè бодрат голем број на навивачи, но криво ми е што не им возвративме резултатски. Би сакал да им порачам дека нема да се предадеме и ќе дадеме максимум да ја минеме групата, нагласи Трајковски на денешната прес-конференција.
Трајковски истакнува дека нема потреба од разочарување и оти поразот нема да ја наруши атмосферата во националниот тим. Фокусот, како што нагласи, останува на фудбалот, на Украина како нареден ривал во групата Ц. Мотиви, исто така, не недостасуваат и нема да дојде до психолошки пад по поразот од Австријците.
– Со евентуален триумф над Украина, ќе имаме големи шанси да ја минеме групата. Мечот е клучен за нив, но клучен ќе биде и за нас и во него ќе влеземе со победнички желби и амбиции. Во четврток нè очекува нова голема борба што ќе се обидеме да ја добиеме, додаде Трајковски.
Мечот меѓу Македонија и Украина е во четврток од 15 часот на Националната арена во Букурешт. Украинците во првиот меч во групата Ц на ова ЕП загубија од Холандија, во Амстердам, со 2:3.