Со моментно вакцинираните граѓани, нешто под 300.000 и планираната уште толкава бројка да се вакцинираат до крајот на летото, ќе се постигне процент на имунизирано население за кој може да се каже дека е колективен имунитет, изјави министерот за здравство Венко Филипче на заедничката прес-конференција со кинескиот амбасадор во земјава, Џанг Ѕуо, кој донира медицинска опрема за пренамена на одделенија во Клинички центар.
– Што се однесува до колективен имунитет, со оваа динамика кога се даваат околу 15.000 – 20.000 вакцини на ден и кога очекуваме поголем контингент од 600.000 дози на вакцини од „Фајзер“ и 500.000 кинески вакцини и од тоа како ќе оди распределбата во осумте вакцинални пунктови каде има фрижидери кои ладат на -80 степени за фајзеровите вакцини. Сите засега пријавени 180.000 лица во системот за вакцинирање ќе бидат вакцинирани. Почнуваме и кампања за иницијација да се пријавуваат граѓаните за вакцинирање и размислуваме за теренско вакцинирање, во области од каде гледаме дека нема голем број пријавени, изјави министерот Филипче со очекување до крајот на летото покрај овие нешто под 300.000 вакцинирани да има уште толку со што би се постигнала бројка која може да се смета за колективен имунитет. Ова во услови да нема поголеми „изненадувања“ од Делта сојот на коронавирусот, кој засега Кина го пресретнувала со масовна вакцинација па тие што заболувале поминувале со полесни симптоми, му пренел кинескиот амбасадор Ѕуо на министерот Филипче.
Кина ќе продолжи да ве поддржува во борбата со пандемијата во рамки на својата програма „Глобално општество на здравје за сите“ водени од основното правило дека во основата на сечиј живот е да има нормален живот, додаде кинескиот амбасадор кој во оваа прилика се спротивстави на сите политички манипулации.
Министерот од своја страна јавно им се заблагодари на Кинезите за помошта што ни ја дадоа од почетокот на пандемијата преку личната заложба во помошта за менаџирање со здравствената криза, за донацијата на почетокот од 30.000 долари заштита за медицинските работници, донацијата од армијата на Кина со 100.000 дози од вакцината на „Синофарм“ итн.