Премиерот на Словенија, Јанез Јанша, денеска во Љубљана заедно со претседателката на Европската Комисија, Урсула фон дер Лајен, го означи почетокот на словенечкото претседателство со Европската Унија (ЕУ). Двајцата потврдија дека се работи на формален старт на преговори со Северна Македонија и Албанија во наредните шест месеци, јави дописничката на МИА од Брисел.
Словенечкиот премиер Јанша изјави дека проширувањето е стратешка цел на ЕУ и како таква тој очекува дилемите да се решат и да се постигне согласност помеѓу 27-те земји членки на ЕУ за време на претседавањето на неговата земја.
Претседателката Фон дер Лајен од своја страна потврди дека ќе се вложат напори од страна на Европската Комисија за постигнување на оваа цел исто така.
– Посветени сме да оствариме напредок во процесот на проширување преку формално отворање на пристапните преговори со Албанија и Северна Македонија, и го поздравувам организирањето на самитот со западен Балкан, изјави шефицата на европската извршна власт.
Овој самит треба да се одржи во Словенија на 6 октомври.