Опозициската ВМРО-ДПМНЕ бара носење на Резолуција во македонското Собрание за преговорите со Бугарија, СДСМ, пак, одговори оти нема потреба од такво нешто. Според замисли на опозицијата, документот би бил обврзувачки за движење на владата во негови рамки при изнаоѓање на решение во спорот со источниот сосед и деблокирање на евроинтегративниот процес на земјава. Мотивите за таквиот потег, според лидерот на партијата, Христијан Мицкоски, се отсуството на црвени линии на власта во преговорите со Бугарија и тргување со јазикот и идентитетот.
– Во самата резолуција се содржани дефинициите и јавно, повторувам и јавно декларираните ставови на МАНУ, најстариот универзитет УКИМ и МПЦ ОА-Јустинијана Прима за јазикот и идентитетот. Она што го нудиме не е авторски текст на ВМРО-ДПМНЕ, туку тоа што го дефинирале највисоките научни и општествени авторитети како заеднички државен и национален интерес“, изјави претседателот на ВМРО-ДПМНЕ, Христијан Мицкоски.
Документот би предвидувал и водење на преговори врз рамноправна основа со почитување на меѓународното право, на автохтоноста на македонскиот народ и на неговиот историски, јазичен, културен и религиски континуитет.
– Резолуцијата е документ од кој треба да произлезе национален консензус, брана за сите напади и обиди за манипулација и ќе биде заеднички став на Македонија за сите, повторувам за сите важни прашања. Не е доволно да се збори за црвените линии, овојпат тие треба да се бранат. А, тоа е наша должност“, додаде Мицкоски.
Набрзо по промоција на опозициската идеја, стигна одговор од владеачката партија во кој се нагласува оти нема потреба за такво нешто, бидејќи идентитетот и јазикот се меѓународни потврдени и признати.
– Ако Мицкоски не е сигурен во својот идентитет, во јазикот кој го зборува, нема потреба да поднесува резолуции. Македонскиот јазик и македонскиот идентитет се меѓународно потврдени и признати и нема потреба од било каква расправа за тие прашања, особено не во македонското собрание“ – соопштија од СДСМ.