Скопјанецот Јовица Ѓорѓиев на градската плажа во Саранда, Албанија, вчера успеал да спаси 15-годишно девојче кое било извадено од морето во бесознание, без знаци на живот и помодрено. Јовица, кој инаку работи како возач во скопската Служба за итна медицинска помош, на Фејсбук раскажа дека извршил итна реанимација која била успешна.
Јовица, кој е на летување во Албанија, во критичните моменти се затекнал на местото на несреќата и откако успеал да го спаси девојчето, сите коишто се затекнале на плажата и биле сведоци на неговиот подвиг, му кажале Браво.
Вработените во скопската Брза помош се горди на својот колега.
– Нашите возачи се перфектно обучени и да пружаат итна медицинска помош, но, за жал, не се соодветно платени. Во странство овие служби се нарекуваат парамедикуси, а кај нас се уште немаат статус, иако сите колеги се навистина екстра способни и за помош при вакви животозагрозувачки ситуации. Барем да добијат статус како помошен медицински персонал, – изјави за НоваТВ, д-р Силвана Михајловска Масловарис, дежурна докторка во Службата за итна помош.
Ѓорѓиев на Фејсбук раскажа за итната реанимација.
„На ова место на Градската плажа во Саранда извадија 15-годишно девојче (давеник) во бесознание и циенотични усни, со добар пулс. Пристапив по протоколите за давање прва помош на давеници што сме ги давале и со нашите обуки во Брза помош, го реанимирав и девојчето поврати вода и ја доби бојата на лицето како на здрав човек. Така средена и освестена ја предадов на колегите од Брза помош – Саранда во стабилна состојба и сите на плажа ми дадоа големо БРАВО за мојата стручност, смиреност и професионалност. Верувам дека младата девојка ќе биде повнимателна во следните денови“, напиша Ѓорѓиев на Фејсбук.
(Љ.Б.)