Министерството за образование и наука донесе одлука да ги зголеми стипендиите на учениците и студентите, соопшти министерката Мила Царовска која денеска одржи средба со претставници на средношколските и студентските организации.
– На овој начин на кој што заеднички ги усогласивме стипендиите за учениците и за студентите сметаме дека добиваме поквалитетни финансиски средства или повисоки финансиски средства кои што ќе одат кај семејствата на кои што им се најпотребни социјалните се зголемуваат за 100 проценти, од 3000 денари стануваат 6000 студенстките. Ученичките, некои беа 2000, некои 2200, некои 2900, сега сите се усогласуваат на ниво од 3500 денари. Додека кај хемија, физика и математика за студентите имаме покачување на 18 илјади денаризатоа што тие навистина се дефицитарни во државата, истакна Царовска.
Таа потенцираше дека после десет години за прв пат има враќање на стипендирањето на втор и трет циклус во државата, бидејќи до сега сите стипендии за втор и трет циклус одеа надвор од државата и тоа стално правеше одлив на младите мозоци.
Ева Цветковска, претседателка на Универзитетското студентско собрание (УСС) на УКИМ, рече дека се реализираат нивните заложби за воведување нови и за дуплирање на износот на социјалните стипендии.
– Овие барања произлегуваат од декларацијата „Млади, образование и иднина“ која ја потпишавме на 12 јули 2020 година, напишана од студентските собранија и потпишана од шест политички партии. УСС УКИМ континуирано инсистираше на реализација на декларативните барања. Со поднесување до телото „Млади МОН“ за дуплирање на социјалниата стипендија, воведување стипендии за втор и трет циклус студии и за дефицитарните области, денеска конечно можеме да кажеме дека оваа идеја е реализација, истакна Цветковска.
Агрон Демири, претседател на УСС на Универзитетот на ЈИЕ, истакна дека во изминатите месеци интензивно работеле на мерки за подобрување на стандардот на студентите и дека резултат на тоа е оваа одлука.
– Државата на овој начин го стимулира нашиот труд и постигнувањата на подобри резултати, рече Демири, заблагодарувајќи се на МОН и на останатите студентски собранија за успешната соработка.
Одлуката на МОН да ги зголеми и стипендиите за средношколците ја поздрави Лука Павиќевиќ, претседател на Сојузот на средношколци.
– Оваа одлука е добра и е производ на долгомесечната соработка и консултација на МОН и Сојузот на средношколците и претставничките тела на студентите. Останува во иднина, како и досега, Сојузот будно да го следи спроведувањето и исплаќањето на стипендиите, рече Павиќевиќ.
Министерството за образование и наука веќе упати апел до сите корисници на некоја од категориите на стипендии за средношколци и за студенти запишани на додипломски студии од прв циклус, доколку ги исполнуваат условите за продолжување на правото на стипендија, потребните документи да ги достават согласно рокот кој е наведен во потпишаниот договор.
Рокот за продолжување на правото на ученичка стипендија е од 1 до 30 септември 2021 година. Секој корисник на стипендија треба да достави потврда за редовен ученик за учебната 2021/2022 година и копија од последното свидетелство.
Рокот, пак, за продолжување на правото на студентска стипендија е од 1 до 31 октомври 2021 година. Секој корисник треба да достави потврда за запишан нареден семестар, односно година на студирање и уверение/потврда за предвидени и положени испити со успех од претходните години и индекс на увид, како докази дека има положено 80% односно 90% (зависно од типот на стипендија кој го користи) од предвидените испити, односно дека го одржал просечниот успех на студирањето, согласно договорот за стипендија.
Документите се доставуваат електронски, со прикачување на соодветната документација на е-услуги, а доколку ученикот, односно студентот не е во можност да достави електронски, документите се доставуваат преку писарницата на Министерството за образование или по пошта (препорачана пратка со повратница) на адреса: бул. „Св. Кирил и Методиј“ бр.54, 1000 Скопје или директно во Министерството.