Бугарскиот министер за здравство Стојчо Кацаров денеска порача дека неговата земја се подготвува да донира 51.000 дози на вакцини против ковид-19 за С. Македонија.
Како што јави дописникот на МИА од Софија, според Кацаров, Бугарија досега донирала 172.000 дози на вакцини за Кралството Бутан и 50.000 дози на Босна и Херцеговина, а се подготвува да продаде 100.000 дози на Кралството Норвешка и 546.000 дози на Португалија.
Пред Националното собрание, бугарскиот министер за здравство рече дека официјална Софија презела чекори за купување на сосема нова австриска вакцина, која сè уште чека одобрување за употреба.
Развиена е врз основа на умртвен вирус, додаде Кацаров.
Бугарија аплицираше за вкупно 13.909.963 милиони дози вакцини во 2021 година, од кои 1.183.200 милиони дози се испорачани до 10 август.
Кацаров увери дека на населението во Бугарија му се обезбедува доволен број лекови против ковид-19 до крајот на годината, како и за 2022-2023 година и затоа Бугарија може да си дозволи да донира и продаде одредени количини за да не истече нивниот датум и тие не треба да се уништат.
Неодамна, Кацаров за Бугарското национално радио изјави дека над два милиони бугарски државјани се вакцинирани со првата доза, а нешто повеќе од милион граѓани ја примиле втората доза.