Талибанците, како што најавија неодамна, објавија формирање на Исламски Емират на Авганистан, четири дена откако го преземаа Кабул од владата и 102 години откако Британија се откажа од власта над таа земја, пишува РТ.
Портпаролот на Талибанците, Забихула Муџахид преку објава на Твитер го објави формирањето на новата држава, споделувајќи и фотографија од нејзиното знаме со грбот. Соопштението доаѓа на помалку од една недела по падот на главниот град на Авганистан, Кабул, во рацете на оваа исламистичка екстремистичка група.
Талибанците веќе подолго време во својата комуникација го користат името Исламски емират на Авганистан. Екстремистичката група во неделата објави дека ја презела контролата врз Кабул, откако претседателот на Авганистан, Ашраф Гани, избега од земјата, барајќи засолниште во Обединетите Арапски Емирати.
Во вторникот, во отсуство на Гани, првиот потпретседател Амрулах Салех рече дека во моментот е во земјата и дека, според Уставот, тој е лидер во земјата.