За влез во Црна Гора важат истите мерки како и досега и тоа, освен за туристите од Р.С. Македонија, и за оние од регионот: од Хрватска, Србија, Босна и Херцеговина, Албанија и Косово.
Државјаните на Р.С. Македонија можат и понатаму да влегуваат во Црна Гора без доказ за вакцинација, сертификат за прележан ковид-19, негативен PCR-тест или негативен брз антигенски тест. За влез во Црна Гора важат истите мерки како и досега и тоа, освен за туристите од Р.С. Македонија, и за оние од регионот: од Хрватска, Србија, Босна и Херцеговина, Албанија и Косово. Освен важечки патни исправи, на гостите од овие држави за влез не им требаат дополнителни сертификати во однос на ковид-19 или PCR-тестови – изјавија денеска за НОВА ТВ од Амбасадата на Црна Гора во Р.С. Македонија.
Според најавите, овие мерки за влез во Црна Гора за туристите од регионот треба да важат до 10 септември годинава.
По објавувањето на веста дека „Црна Гора денеска воведе нови мерки за заштита од ковид-19, што првенствено се однесуваат на условите за влез во земјата – дека во Црна Гора ќе може да се влезе само ако нејзините граѓани и туристите покажат дека се вакцинирани против ковид-19, да приложат PCR-тест не постар од 72 часа, да имаат потврда дека прележале или со брз антигенски тест не постар од 48 часа“, во Амбасадата на Црна Гора во Скопје почнале да се јавуваат граѓани коишто се заинтересирани да летуваат во оваа земја.
– Многу јавувања имавме денеска, а сите коишто се интересираа ги информиравме дека новите мерки не важат за македонските граѓани. Чекаме да стаса и официјалната информација од владата на Црна Гора – ни изјавија од Амбасадата.
Исто така, за туристите од Македонија уште во јуни годинава од црногорската влада најавија дека ќе бидат бесплатни PCR-тестовите за оние државјани на кои ќе им се бара овој документ при враќање во матичната држава.
– За туристите од Р.С. Македонија да можат да го направат PCR-тестот бесплатно во Црна Гора, треба да се уредно пријавени и да имаат регулирано туристичка такса – додаваат од Амбасадата на Црна Гора.
Доколку се случи некој од нашите државјани заболи од ковид-19 за време на престојот во Црна Гора, и лекувањето ќе биде бесплатно.
Од 1 септември годинава, домашни и странски државјани ќе можат да влезат на територијата на Република Северна Македонија доколку претходно на граничниот премин приложат сертификат/потврда за извршена имунизација (вакцинација) од вирусот SARS-CoV-2, односно примени најмалку две дози на вакцина против ковид-19 или сертификат/потврда за прележан ковид-19 во последните 45 дена, сметајќи од денот на оздравување или медицинска потврда со негативен резултат од RT PCR SARS-CoV-2 тест, направен 72 часа пред влез на територијата на Република Северна Македонија.
За нашите граѓани кои ќе се враќаат во земјата по 1 септември, а немаат ПЦР тест или потврди за примена вакцина или за прележан ковид-19, ќе се одреди мерка карантин од седум дена домашна изолација со решение од Државниот санитарен и здравствен инспекторат.
Љубица Балабан