Преостануваат уште седум дена за јавен увид во Избирачкиот список (9 септември на полноќ), а девет дена (11 септември на полноќ) за поднесување на кандидатските листи за градоначалници и советници до Општинските изборни комисии за локалните избори закажани за 17 октомври.
Јавниот увид во Избирачкиот список може да се направи во подрачните единици и канцеларии на Државната изборна комисија и електронски преку веб страната на ДИК. До 1 септември се провериле вкупно 10.724 лица во Избирачкиот список.
Поднесени се вкупно 27 барања за запишување во Избирачкиот список, 23 барања за бришење на податоците од Избирачкиот список и 15 барања за измена на податоците во Избирачкиот список, посочија од ДИК. Исто така, до ДИК на е-маил адресата upisis@sec.mk се поднесени вкупно 35 барања.
Истовремено тече рокот и за пријавување на набљудувачи на локаните избори.
Иако кампањата не е започната, потенцијалните и најавени учесници на изборите ги започнаа своите активности како на терен меѓу граѓаните, така и на социјалните мрежи. Партиите деновиве треба да ги соопштат преостанатите кандидати за градоначалници и за советници за локалните избори. Тие најавуваат позитивни кампањи, но продолжуваат меѓусебните обвинувања.
До крајот на неделава се очекува во земјата да пристигнат првите 200 терминали од компанијата „Дермалог“ за вчитување на отпечатоци од прсти на гласачите. Вакви терминали ќе се применат првпат на овие избори.
Премиерот Зоран Заев смета дека сè уште има време за да пристигнат терминалите за отпечаток од прст и навремено да се почне со подготовките на изборите што ќе се одржат на 17 октомври.
Навистина не ги знам деталите и за нив се информирам преку медиумите. Мојот личен впечаток е дека терминалите ќе стигнат навреме, затоа што сè уште има време, дури и за првите терминали за тест периодот во кој е предвидено да има тестирање за да може комплетно да ги покриеме сите избирачки места, рече вчера Заев.
Локалните избори на 17 октомври ќе се спроведат согласно Изборниот законик, којшто, иако имаше најава, сепак нема да се менува.
Министерот за правда Бојан Маричиќ вчера изјави дека измените во Изборниот законик ќе се разгледуваат по локалните избори. Тој смета дека нема никаква смисла сега да се прават измените, ниту, како што вели, сакаат да вознемируваат кого било во изборниот процес, со тоа што би менувале правила, а кои непосредно влијаат на изборниот процес.
Ние, како Влада не планиравме никаков потег, затоа што видовме дека имаше блокада и не можеше да се реализира измената на Законот пред летниот распуст на Собранието. Собранието работи уште овој месец, некаде до 27 септември, а потоа, поради кампањата, повторно ќе биде на пауза, вели Маричиќ.