Република Северна Македонија останува посветена на глобалната хуманитарна акција која има за цел да им помогне на граѓаните од Авганистан, кои во изминатиов период работеа на подобрување на човековите права, демократијата и мирот, соопштија од Владата откако во земјава на скопскиот аеродром пристигна група од 44 граѓани од Авганистан. Станува збор за граѓани вработени во организацијата „Тиркиз моунтејн“ (Тurquoise Мountаin).
– Овие лица се активисти на оваа организација, но меѓу нив има и членови на нивните семејства. Организацијата „Тиркиз моунтејн“ е основана во 2006 година од принцот Чарлс со хумана мисија, која изминативе години имаше свои успешни активности во Авганистан. Дополнително, оваа организација реставрираше повеќе од 150 историски објекти, третираше околу 165 илјади пациенти во клиниката во Кабул, отвори и поддржа повеќе од 50 мали бизниси во Авганистан, Мјанмар, и други активности, соопштија од Владата.
Тие ќе бидат времено сместени во Скопје, сè до обезбедување на трансфер до нивна крајна дестинација. Трошоците и за оваа група ќе бидат целосно покриено од меѓународните организации.
Втората група граѓани на Авганистан ќе поминат низ стандардна процедура, како поддршка од Црвениот крст, безбедносна проверка и заштита, медицинска поддршка, ПЦР тест и можност за вакцина.